Description
Vetkers en neonlig deur Abraham H. de Vries is ’n versameling kortverhale wat in 1960 verskyn het, ná Proegoed in 1959, en later in 1962 en 1966 herdruk is. Die bundel beweeg tussen die platteland en die stad, met verhale wat wissel van humoristies en realisties tot donker, geheimsinnig en fantasties.
Die stadsverhale sluit onder meer Sy laaste weddenskap, ’n humorverhaal oor ’n plattelander op sy oudag in die stad, en Afrika-toonbank in, waarin sielkundige spanning en die verrassingsverhaal kundig verweef word. Die plattelandse verhale neem egter ’n veel donkerder rigting. Die gemoedelikheid van vroeëre verhale maak toenemend plek vir ’n makabere, demonies-gelaaide geheimsinnigheid, met Die gusooi as ’n hoogtepunt van hierdie fantastiese en grusame aanslag.
