Elmar Konig, bekende impresario in die plaaslike kunstewereld, bied Linde Derksen een van die hoofrolle in sy musiekblyspel Die purper kleed aan. Linde is pas aangewys as die wenner van ‘n internasionale musiekkompetisie.
Die instudering van die rolle vind in afsondering op ‘n suikerplaas in KwaZulu Natal plaas. Linde vertrek alleen daarheen, en word deur ‘n jong man met ‘n wolf by hom gehelp toe haar motor in ‘n sloot beland. Niemand op die plaas glo haar vertelling nie en sy word ook gewaarsku om nie naby die digte bos te kom nie …
Sy ontdek met die verloop van tyd eienaardige dinge: Die geheimsinnge jong man lyk op ‘n druppel water na ‘n beroemde musiekkenner wat ‘n paar jaar gelede dood is. Sy hoor soms in die nag ongelooflike klavierspel vanut die bos, en daar sluip donker gestaltes op Largo se werf rond.
Teen alle waarskuwings in gaan soek sy antwoorde in die verbode bos – en wat sy daar vind, verander die verloop van ses mense se lewens onherroeplik …
