Description
Die Vis Loop Mooi Vandag deur Alsoon Wessels is ’n Afrikaanse versamelbundel met humoristiese, nostalgiese en hartroerende stories oor mense, verhoudings en die lewe langs en weg van die viswaters. Soos in sy vorige bundel, Die vis wat knor en ander vistermanstories, vertel Wessels met ’n lekker skeut humor van die sonderlinge dinge wat met gewone mense gebeur.
Van ’n pa en seun wat ná jare van vervreemding versoen raak, tot ’n visinspekteur wat barmhartigheid bo sy eie liefdesgeluk kies, bied die bundel stories oor vriendskap, liefde en menslikheid. Daar is ook hope komiese vertellings: ’n gorilla wat gholf speel soos Ernie Els, snoeke wat in ’n hoofwegkruising opgeveil word en ’n dominee wat nie sy preek kan klaarmaak nie omdat die gemeente te veel lag.
Die stories neem die leser van die Suid-Kaapse viswaters tot op Karoo-plase en ander plekke waar die alledaagse telkens ’n onverwagte wending neem. Van hartseer en nostalgie tot stoutigheid en grillerige vertellings, hier is iets vir elke luim.
