Willemien Malan koop na haar egskeiding ‘n gesondheidsrestaurant in Kaapstad. Omdat sy met dowes gewerk het, kan sy goed liplees, maar sy besef dit kan klante in haar restaurant afskrik. Hulle mag dit as ‘n skending van hulle privaatheid beskou, en sy wil haar restaurant nie laat skade ly nie.
Op ‘n dag kom twee mans die restaurant binne en sonder dat sy wou, liplees sy die een man se vraag aan die ander: Wanneer betaal jy my vir die moord?”
Willemien se oproep aan die polisie ontketen ‘n reeks gebeure en misverstande, en sy raak teen haar sin betrokke by die saak. Maar sy ontmoet ook die aantreklike baasspeuder, Alfons Visser …
