Description
Paultjie glo vas Sneeuwitjie bly in die bos oorkant die spruit – hy het haar dan met sy eie oe gesien, en met haar gepraat ook! In sy angs en alleenheid vind die vierjarige seuntjie ontvlugting in stories, en sy pa is nie altyd seker waar werklikheid eindig en fantasie begin nie.
Andries ontdek dat Zoleka, sy buurman se dogter, net soos Sneeuwitjie lyk, en op aanbeveling van die sielkundige, sorg hy vir gereelde kontak tussen hulle sodat Paultjie kan besef storieboekmense bestaan nie werklik nie.
Tot hy een aand laat by die huis kom en sien dat Paultjie se Sneeuwitjie nie ‘n storie was nie, maar die reine waarheid. Viccie is vir hom in lewende lywe nog mooier as haar storieboekprentjie, maar Andries weet nie of hy ooit haar vertroue en liefde gaan wen nie, want in haar hart le jare se hartseer opgesluit …
