Koos Meyer was ’n karakter soos min. Reeds op laerskool het hy sy entrepreneursvernuf gewys met die slimste geldmaakplanne. Op Stellenbosch het hy bekendheid verwerf as ’n poetsbakker en kansvatter van formaat. Maar sy lewenspad het hom veel verder geneem—van joernalis en prospekteerder tot grootwildjagter, matroos, hotelbestuurder, wildbewaarder en selfs toespraakmaker.
Sy humorsin was natuurlik en moeiteloos; hy het nooit nodig gehad om snaaks te probeer wees nie—hy was dit net. Maar agter die lag en skelmstreke was daar ’n dieper mens, een waarvan min mense regtig bewus was.
Hierdie boek bring ’n versameling van bekende en minder bekende Koos Meyer-verhale, propvol nostalgiese plesier vir dié wat hom geken het en ’n aansteeklike kennismaking vir jonger lesers.
Soos Ollie Viljoen sê: “Daar is net één Koos Meyer.”
