In die derde boek van Marzanne Leroux-Van der Boon se gewilde Israel-reeks, Shomer Yisra’el, bevind Marc en Rivkah Krige hulself in die hart van ’n toenemende oorlog. Dit is die somer van 2006 in Jerusalem, en die Tweede Libanese Oorlog bars los. Te midde van die geweld probeer die jong gesin hul plek vind in ‘n land waar gevaar deel van die alledaagse bestaan is.
Marc, ’n sensitiewe kunstenaar, weet hy sal binnekort opgeroep word vir diensplig. Die situasie word nog meer gespanne wanneer Rivkah ontdek sy is weer swanger — en sy vasbeslote is om as paramedikus haar deel tot die verdediging van Israel te lewer, iets wat Marc glad nie ondersteun nie.
In hierdie spanningsvolle tyd ontmoet hulle Henok en Sarah Kambungu, Suid-Afrikaners op hul eerste besoek aan Israel, wat onverhoeds betrokke raak by die oorlog. Henok dra self aan die letsels van sy eie traumatiese oorlogservarings — die Kassinga-slagting in Namibië.
Te midde van oorlog en onrus staar Rabbi Chaim Cohen, Marc se skoonpa, die grootste besluit van sy lewe in die gesig: om openlik te bely dat Yeshua die Joodse Messias is. ’n Keuse wat sy lewe en dié van sy familie onherroeplik sal verander.
