Kitskuns: Kuns Uit Die Gewone – Angie Franke, Monique Day-Wilde

Met oorskietverf wat jy drup, dribbel, blerts, smeer, sleep of spat op enige denkbare oppervlak, van ‘n ou deur of ‘n geroeste hek, tot klampleers, veselbordblokke, ‘n spieel of ‘n vergete magneetbord, kan jy jou hele huis opkikker met maklike, treffende kunswerke. Voeg tekstuur by met sement, oksiede, gompasta, sand, metaalvysels of kraakvuller en jy het drie-dimensionele items wat op verskeie maniere aangewend en uitgestal kan word. Die meer tradisionele olie- en akrielskilderwerk kry ook aandag, met die skrywers se eie besonderse benadering tot verf-volgens-nommers en kuns op plastiek.

Benewens duidelike stap-vir-stap aanwysings en foto’s en pragfoto’s van elke voltooide kunswerk, is daar nuttige patroneen ontwerpe wat jy kan gebruik op jou pad na roem. Die titel oorbrug die gaping tussen kuns en handwerk met maklike handwerktegnieke wat enigeen kan gebruik vir treffende skilderye. Jy kan dit ook doen – jy moet net weet hoe!